Rusiye Devlet Dumasınıñ maliyeviy bazar komitetiniñ reisi Anatoliy Aksakov, rusiye mebusları işğal etilgen Qırımda offshore yaratmasında Rusiye akimiyetini qandırıp olamağanını bildirdi.
“Şimdilik bu yapılmadı. Bir qaç muzakere komitette de keçirgen edik, amma alâ daa akimiyetni bu şekil Qırımda çalışa bileceginde işandırıp olamadıq. Ne yazıq ki, faqat yaqın vaqıtta bunıñ olmacağını ayta bilem”, - dep Aksakovnıñ sözlerinden yaza “Krıminform”.
Mebus, Qırımda “sadece serbest iqtisadiy zona degil de, amma kerçek saiplerini gizlegen çesit iş şekilleriniñ çalışmasına yol bergenuquq qaideleri olğan belli bir manada offshore” yaratmasınıñ tarafdarı olğanını qayd etti.
Onıñ aytqanına köre, bu kibi offshorelar Rusiyeniñ eki bölgesinde endi yapıldı: Kaliningrad ve Primorskiy bölgesinde.
“O muvafaqiyetli tecribe olıp çıqsa, zanımca, onı Qırımda da amelge keçirmek mümkün ve bazıları, şu sıradan yabaniyler de, bu imkâniyetni qullanır dep tüşünem”, - qoştı o.
Oktâbr 2-sinde rusiye nazirlikleri, işğal etilgen Qırımda yatırımcılarnıñ anonimligini saqlaycaq trastlarnıñ yaratmasınen bağlı qanun leyhasını muzakere etkeni bildirildi. Qanun leyhası müellifi, Devlet Dumasınıñ mebusı Sergey Mironovnıñ aytqanına köre, böyle adımlar, Rusiyeniñ Qırım işğal etkeni neticesinde Avropa Birligi ve AQŞ tarafından kirsetilgen sanktsiyalarnı kenarda qaldırmağa imkân berir.
İyünniñ 18-ine AB-niñ Şurası Rusiye ilhaq etken Qırımğa qarşı olğan sanktsiyalarnı daa bir yılğa uzattı. Olar AB-de bölükleri olğan şirket ve şahıslarğa aittir ve 2019 senesi iyün 23-üne qadar üküm sürecek.
