Ukrayınada 2022 senesi sentâbrniñ 17-ne qadar Rusiyeniñ silâlı istilâsı neticesinde 1145 bala zarar kördi, dep haber ete Ukrayına Baş prokurorınıñ ofisi.
Bala meselelerinen oğraşqan prokurorlarnıñ resmiy malümatına köre, 389 bala vefat etti ve 756 bala çeşit yaralar aldı.
«Eñ çoq bala Donetsk vilâyetinde – 394, Harkiv vilâyetinde – 218, Kyiv vilâyetinde – 116, Mıkolayıv vilâyetinde – 72, Çerniğiv vilâyetinde – 68, Lugansk vilâyetinde – 61, Herson vilâyetinde – 55, Zaporijjâ vilâyetinde – 46, Dnipropetrovsk vilâyetinde – 26 zarar kördi», – dep aytıla haberde.
Sentâbrniñ 14-nde Hersonda Rusiye açqan ateş neticesinde 8 ve 12 yaşında qızları olğan qoranta elâk oldı, dep qayd etti Ukrayına prokurorları. Bundan ğayrı, sentâbrniñ 5-nde Rusiye ordusı Harkiv vilâyetiniñ İzüm rayonı Nova Ğusarovka köyünde açqan ateşi neticesinde 14 yaşında bir genç can berdi.
«İşğalcilerniñ Harkiv vilâyetindeki İzüm rayonında yapqan cinayetleri qayd etilgende martnıñ 9-nda 5 ve 8 yaşlarında qızları olğan bir aileniñ elâk olğanı belli oldı», – dep aytıla haberde.
Sentâbrniñ 15-nde Rusiyeniñ Donetsk vilâyeti Kramatorsk rayonındaki Stâtogorsk şeerine açqan ateşi neticesinde 17 yaşında bir genç yaralandı, dep bildire Ukrayına Baş prokurorınıñ ofisi. Sentâbrniñ 16-nda Rusiyeniñ Harkivge açqan ateşi neticesinde 5 v 17 yaşında balalar yaralandı, dep qayd ete prokurorlar.
Ukrayına Baş prokurorınıñ ofisi qayd etkenine köre, bu raqamlar tam degil, çünki faal cenk uruşları ketken yerlerde, işğal etilgen ve azat etilgen topraqlarda iş devam ete. Rusiye Federatsiyasınıñ bombardımanları ve ateşi sebebinden 2500 oquv yurtu zarar kördi: 289-ı tamamen viran etildi.
Bir çoq delilge baqmadan, Moskva Ukrayınada vatandaşlarğa ateş açqanını red ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
