Ukraina ombudsmeni Lüdmila Denisovanıñ bildirgenine köre, Rusiye siyasiy sebeplerden 133 Ukraina vatandaşını taqip ete. Bunı o, 2020 senesi Ukrainada vatandaş ve insan aqları ve azatlıqlarına riayet etme ve qorunma vaziyeti aqqında yıllıq esabatnı taqdim etkende bildirdi, dep haber ete Azatlıq Radiosı.
«Rusiye siyasiy sebeplerden 133 Ukraina vatandaşını taqip ete. Olardan 114 tevqif etilgen: 97 Rusiyede, 17 Qırımda. Usul uquqlarnıñ esas bozuluvı, qanunsız olaraq tevqif etilgen qırımtatarlarnıñ Qırım yarımadasında tahqiqat tevqifhanelerinde yaramay şaraitte, tıbbiy yardım olmadan, COVID-19 vaqtında şahsiy qoruyıcı vastasız tutulması. Ve Jeneva şartnamesine baqmadan vatandaşlarımıznıñ Rusiye Federatsiyasında yaramay şaraitte qanunsız qalması», – dedi o.
BMT insan aqları boyunca 46-ncı sessiyasınıñ iştirakçilerine muracaat etip, Ukraina Yuqarı Radasınıñ insan aqları vekâletlisi Lüdmila Denisova, vaqıtnca işğal etilgen Qırımda ve Donbasnıñ bölgelrinde Rusiye ve onıñ tarafdarı olğan küçler 376 kişini qanunsız tuta, dep bildirdi.
Qırım işğali
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
