Ukrayınada avgustnıñ 23-nde Devlet bayraq künü qayd etile.
Bu bayram 2004 senesi o vaqıt prezident olğan Leonid Kuçma tarafından ilân etildi, ondan soñ prezident olğan Viktor Yuşçenko 2009 senesi avgustnıñ 23-nde Ukrayına bayrağını köterüv merasimini başlattı.
Ukrayına prezidenti Volodımır Zelenskıy bayram aqqında tünevinki muracaatında ayttı.
«Qıymetli ukrayınalılar, bu künleri, bayrağımız ve mustaqilligimiz kününi qayd etkende, çetelde olsañız, lütfen, Ukrayına aqqında hatırlatıñız, anda Ukrayına bayrağınen oluñız ve işğalcilerniñ cinayetleri aqqında kerçeklerni tarqatıñız», – dep ayttı Zelenskıy.
Devlet bayraq künü munasebetinen Ukrayına akimiyetiniñ iştiraki ile tedbirler olacaqmı haber etilmedi, hususan telükesizlik maqsadınen.
Yarın, avgustnıñ 24-nde, Ukrayınada Mustaqillik künü qayd etilecek.
Ukrayına istihbaratı ukrayınalılarnı avgustnıñ 24-nde «pek muqayt olmağa» çağırdı, çünki «Rusiye ayrı künlerge kerçekten emiyet bere».
Bundan ğayrı, Ukrayına mahsus bağ ve malümatnı qoruv devlet hızmeti Ukrayına Mustaqillik kününde Rusiye hakerleriniñ Ukrayınadaki resurslarına ücümleri quvetleşe bile, dep tenbiledi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
