Noyabr 8-inde saba Canköy rayonınıñ Qalay (Azovskoye) qasabasında yerli sakin Halil Ablâmitovnıñ evini tintediler.
“Qırım birdemligi” cemaat birleşmesi haber etkeni kibi, evde beş qoranta azası, olardan birisi - bir yarım yaşlı bala yaşamaqta. Tintüv vaqtında esli-başlı baba yaramadı, evlerine “acele yardım”nı çağırttılar.
Tintüv keçken azbar yanında eki “gazel” maşnası köründi. Olardan birisi - küç organlarnıñ hadimlerine ait olğan yengil maşna. Quvetçilerniñ arasında - kiyimlerinde OMON belgisi olğan 11 maskalı adam edi.
Tintüvden soñ rusiye quvetçileri, ev saibiniñ oğlu Ablâlim Ablâmitovnı bilinmegen yerge alıp ketti. Bundan ğayrı, Ablâlimniñ yüklü apayı Aycannı da alıp kettiler.
Şimdilik tintüv sebepleri belli degil. Rusiye quvetçileri bu adiseni tefsir etmey. Qırım.Aqiqat vaqianıñ tafsilâtını bilmege tırışa.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
