Qırımtatar asıllı ukrain yırcısı Camalanıñ The Great Pretender türküsine muzıkalı videonıñ ilk kösterilmesi oktâbr 31 künü saat 20:00 olacaq. Bunıñ aqqında yırcınıñ matbuat hızmeti haber ete.
Rejissörlıqnı, “Okean Elzı”, Pianoboy, “Druğa rika”, BRUTTO ve başqa taqımlar içün yapqan işlerinen belli, Anna Burâçkova yaptı.
“Şimdilik, bellesem, bu - menim eñ sevimli Camalanıñ türküsi, men er şeyni begenem - metin, ğaye, er muzıkalı aletniñ yañğıramasını. Men, bu yırnıñ er notasında peyda olğan özgün Camalanı begenem. Video çekmek içün, baş qaramanımız tabiiy körünecek şeerni, biznen tesirleşleşip olacaq, sade ve zengin şeerni qıdırdıq. Bu, elbette ki, Berlin”, - dedi rejissör.
The Great Pretender türküsi, Camalanıñ oktâbr 12-sinde çıqqan beşinci studiya “Krıla” albomına kirdi.
Daa evel haber etildi ki, noyabr ayında Camala, “Krıla” albomına qol tutıp, Ukrainanıñ büyük şeerlerinde kontsert berecek.
Qırımtatar asıllı ukrain yırcısı Camala 2016 senesi İsveçte (Şvetsiyada) keçken «Eurovision» yarışında ğalebe qazandı. O, qırımtatar halqınıñ sürgün etilüvi aqqında «1944» yırını icra etip, yeñdi. Ukrain yırcınıñ ğalibesinden soñ 2017 senesinde yarış Kyivde ötkerildi.
