Serbest iqtisadiy zonanıñ (SİZ) iştirakçileri yılnıñ başından itibaren ilhaq etilgen Qırımnıñ bücetini 5,4 milliyard rublege (2,22 mlrd hrn – QA) arttırdılar. Bunı Kremlniñ kontroli altında olğan Qırım Maliye nazirliginiñ matbuat hizmeti, müessiseniñ başlığı İrina Kivikoğa atıfta bulunıp, bildirdi.
Kiviko: «2018 senesiniñ 7 ayı içinde SİZ iştirakçilerinden birleştirilgen bücetke 5,4 mldr ruble kelip tüşti», – dedi.
Onıñ aytqanına köre, ağustos 1-ge qadar SİZ iştirakçileriniñ umumiy cedveline 1 341 añlaşma kirsetildi, olarnıñ 40-ı hususiy ve 1 301-i uquqiy şahıslar ile yapıldı. Aynı zamanda 30 uquqiy ve 2 hususiy şahıslar ile añlaşmalar lâğu etildi.
2014 senesiniñ küzünden başlap quvette olğan SİZniñ nizamnamesine binaen, Qırımda umumdevlet bergileri ve alınmları alınmay, bu yerde qayd etilgen hususiy ve uquqiy şahıslar ise ğayrı-rezident sayılalar. Zonanıñ quvette qaluv müddeti – 10 yıl. Bazı siyasetçiler, Ukraina tarafından de-facto kontrol etilmegen terriroriyada qanunnıñ maqsatqa uyğun olğanına dair şübhelerini defalarca ifade ettiler.
