ABD Devlet kâtibi Entoni Blinken ve Frenkistannıñ yañı TİN başı Katrin Kolonna telefon laqırdısında Ukrayinağa Rusiyeniñ keniş mıqyaslı istilâsına qarşı küreşinde "sarsılmaz destekniñ" devam ettirilmesiniñ müimligi aqqında añlaştılar. Bunı Birleşken Devletlerniñ Devlet departamenti haber etmekte.
Bundan ğayrı taraflar, Rusiye prezidenti Vladimir Putin içün başlağan cenki içün "emiyetli masraflar" saqlanmalı, dep qayd ettiler.
Eki diplomat Finlândiya ve İsveçiyanıñ NATO azası olmasına ıntıluvlarını eñ yahşı şekilde desteklemek içün Vaşington ve Parisniñ adımlarını da muzakere ettiler.
Taraflar "Rusiyeniñ Ukrayinada cenki sebebinden bütün dünyada ağır alda qalğan millionlarnen insannıñ telükesizlik ve azıq malları ihtiyaclarına yardım etmek kerek zaruriyeti ile bağlı razı oldılar".
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
