Qırımda patlayıcı madde ve silânı qanunsız saqlağanında qabaatlanğan qırımtatar faali Edem Bekirovnı, Semaşko adına hastahaneden çıqardılar. Bu aqta Ukraina Yuqarı Radasınıñ insan aqları vekâletlisi Lüdmila Denisova bildirdi.
Onıñ aytqanına köre, Bekirovnı qmescit SİZOsınıñ mahsus blokına qaytardılar. Denisova, “tibbiy baquv acele olğanında qasevetlengenini” qayd etti.
“Men tibbiy baquvnıñ böyle tez, acele yapılğanı icün qasevetlenem. Eki afta yerine o üç künde keçti. Bundan ğayrı, Edem daima mutehassıslarnıñ nezareti altında bulunmaq ve kelişken tedaviylevni almaq kerek. Tamam şunıñ içün men, ekimlerniñ tibbiy neticeleriniñ kopiyasını Rusiye ombudsmeni Tatyana Moskalkovadan talap ettim ve daa bir kere Ukraina vatandaşına tam tedaviylevni temin etmesine sebepçi olmağa rica ettim”, - yazdı o Facebookta.
Yanvarniñ 15-nde Bekirov Aqmescitteki Semaşko hastahanesine tibbiy teşkerüv yapılması içün alıp ketirildi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq.
Ukraina Tış işler nazirligi mahkemeniñ qararına qarşı «sert narazılıq» bildirdi.
