Bağçasaray rayonında yağmurnen zararlanğan tayanğıç sebebinden üç köy deyerli 12 saatqa yarıqsız qalğan. Bu aqta “Krımenergo” saytında haber etile.
“Tayanğıç etrafında topraq yuvulğanı neticesinde 169 nomeralı demirbeton tayanğıç egiltildi”, - dep ayttılar müessisede.
“Krımenergo”nıñ malümatın köre, elektrik ağsız bütün Arançı (Suvorovo) köyü qalğan. Bunda ğayrı, Qalımtay (Tenistoye) ve Efendiköy (Ayvovoye) köylerinñ bir qısmı elektrik teminatsız qalğan.
Bunda evel, “Krımenergo” yarımada sakinlerine cedvel boyunca yarıq söndürmeleri aqqında ilân etti.'
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap, Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik, Qırım öz generatorları, Rusiye generatorları ve Kuban energoköprüniñ elektrik ağını qullana.
