Rusiyeniñ Başqortostan şeerinde «Hizb ut-Tahrir davası» boyunca mahküm etilgen Arsen Cepparov azatlıqqa çıqtı, dep haber ete «Qırım birdemligi».
Aprelniñ 17-nde 7 yıl devam etken apis müddeti bitti. Salavatta, koloniya araba qapusında, advokatı Edem Semedlâyev qarşıladı. «Bu kün keldi – azatlıqqa çıqtım. Şimdi İK-16 koloniyasınıñ yanında bulunamız. Çıqqanda qardaşlarımnı körmege pek memnün edim. Bu 7 yıl içinde olğan duyğularımnı aytmağa zor. Pek eyecanlanam, pek qasevetlenem. Endi başqalarını da azatlıqta bekleycekmiz», – dep izaatladı Cepparov.
Advokat Edem Semedlâyevniñ «Qırım birdemligine» bildirgenine köre, onı Qırımda bekleycek.
Aq qorçalayıcılar apis şaraitlerinde Cepparovnıñ sağlıq vaziyeti pek fenalaştı, 2022 senesi oktâbr ayından berli ceza izolâtorında edi, dep qayd ete.
«20 kilogramm azdı. Aşqazan ve mide astı bezi ağıra, yüregi bulana, aşağanda ağrısı bar», – dep bildirdi ömür arqadaşı Zarina Cepparova.
Cepparov 2016 senesi aprelniñ 18-nde tutuldı. «Qırım birdemligi» qayd etkenine köre, apiske alınmazdan bir ay evelsi FSB hadimleri işine kelip, işbirligine zorlaycaq edi. Cepparov başqa insanlarnı çaqmaq kerek edi. Red etse, cinaiy dava açılır, dep qorquzğanlar.
Cepparov razı olmadı ve işten çıqarıldı. 2016 senesi aprelniñ 18-nde Aluşta rayonınıñ Qızıltaş köyünde evinde tintüv keçirildi. Cepparovnıñ davası daa evel tutulğan Refat Alimov, Muslim Aliyev, Enver Bekirov ve Vadim Siruknıñ davasınen birleştirildi. Aq qorçalayıcılar oña «Yaltadaki Hizb ut-Tahrir gruppası» adını berdi.
2019 senesi noyabrniñ 12-nde Cenübiy okrugınıñ arbiy mahkemesi (Rostov-na-Donu) Cepparovnı 7 yılğa üküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
