Qırımnıñ Rusiye Yuqarı mahkemesi advokat Edem Semedlâyevniñ uquqçı Rustem Kâmilevniñ 10 künlik apis cezasınen bağlı istinaf şikâyetini baqtı. Bu aqta «Qırım birdemligi» haber ete.
Semedlâyevniñ aytqanına köre, mahkeme Rusiye kontrolindeki Aqmescit Kiyev rayon mahkemesiniñ qararını deñiştirmedi. O, imaye tarafınıñ iç bir deliline emiyet bermedi.
«Böylece, Rustem 10 kün memuriy mabüsler içün mahsus müessisede tutulacaq. Muracaatımız qanaatlendirildi, Rustem mahkemege ketirildi, mahkeme esnasında da iştirak etti», – dep tarif etti advokat.
O, Kâmilevniñ alı «bir qarar», dep qoştı.
Noyabrniñ 7-sinde «Qırım birdemligi» cemaat areketiniñ uquqçıları Rustem Kâmilev ve Lilâ Gemeciniñ evine Rusiye polis hadimleri keldi.
Tintüvlerden soñ Kâmilevni tutıp, Aqmescit şeerindeki Ekstremizm ile küreş merkezine alıp kettiler, anda eki memuriy protokol tizildi. Birisi 2020 senesi paylaşuvnen bağlıdır. Bu yazıda ukrayin faali Oleg Prihodko aqqında aytıldı. Fotoresimde Prihodko bayraq ve Trizub resimi olğan kâğıtnı tutıp tura.
Soñra Kâmilev Rusiye mahkemesine yollanıldı, anda «natsist timsalleriniñ propagandası ya da açıq numayış etilüvi» maddesine istinaden 10 künge apiske alındı ve Rusiye ordusınıñ «itibardan tüşürilüvi» iddia etilgeni içün 50 biñ ruble para cezasını aldı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
