Türkiyeniñ Antaliya şeerinde açılğan “Ukraina Evi” binasında rusiye koloniyasında mabüs olğan ukrain rejissörı Oleg Sentsovnı azat etmek çağıruvnen banner asılıp qoyuldı. Bu aqta Ukraina tış işler naziri Pavlo Klimkin haber etti.
“Bugün Antaliyada Ukraina konsullığını ve “Ukraina Evi” ukrain toplulığınıñ medeniy merkezini açtıq. Binanıñ ögünde, türk tilinde Oleg Sentsovnı azat etmek çağıruv. Adamlarnıñ arasından bir türk:: “O Qırımnı qoruy edi, endi biz onı qorçalamaq kerekmiz””, – dep yazdı Klimkin Twitterde.
Bu künniñ arfesinde Türkiye prezidenti Recep Tayyip Erdoğan, İstanbul Rusiyege azat etilmesine lâyıq ukrainalı siyasiy mabüslerniñ cedvelini yolladı ve bu meseleniñ müsbet çezilüvini beklegenlerini bildirdi.
Oktâbrniñ 5-nde Rusiye apishanesiniñ nezaretçileri bildirdi ki, 145 künden berli açlıq tutqan Sentsov «aşamağa razı olğanını yazma şekilde» bildirdi. Sentsov, Rusiye apishanelerinde tutulğan ukrainalı siyasiy mabüslerniñ azat etilmesini talap etip, açlıqqa başlağan edi.
Daa soñra peyda olğan malümatqa köre, Sentsov oktâbrniñ 6-nda açlıqnı toqtatacaq. O, «zornen aşatacaqlar dep, bunı mecburiy adım» dep adlandırğan edi. Amnesty International, zornen aşatma azap ola, dep qayd etti.
Advokat Dmitriy Dinze ve Sentsovnıñ qardaşı Natalya Kaplan mahküm etilgen rejissörniñ cigeri bozula ve büyrekleri işini toqtata bile, dep haber etkenler. Rusiye ekimleriniñ fikirince, Sentsov açlıqtan çıqma esnasına dayanamaması mümkün.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
