Rusiye nezaretindeki Qırım başı Sergey Aksönov, Qarasuvbazar şeer başı Aleksandr Alekseyenkonıñ istifağa çıqmasını talap ete.
Bu aqta o, iyül 26-sında Qarasuvbazar rayonında köçme oturış vaqtında aytıp berdi.
Muşaverede şeer memuriyetine ait çoq itirazlar aytıldı.
"Qarasuvbazar rayonında vaziyet zayıf: adamlarnıñ çoqusı ne merniñ, ne de onıñ muavinleriniñ bet-sımasını tanımay. Şeer deyerlik cıyıştırılmay, 5 qatlı evlerge aqşam saat 10-dan soñ suv yaramay kele, şeer abadanlaştıruvınıñ seviyesi pek alçaq", - dedi Aksönov.
Merniñ özü muşaverede yoq edi ve bir şeyni tefsir etmedi, çünki o vaqıt tatilde edi.
"Qaç kün onıñ tatili? Kelecek afta onı istifağa çıqarıñız", - dedi Aksönov Qarasuvbazar rayonınıñ memuriyet başı Galina Pereloviçke.
