Birleşken Arap Emirlikleriniñ paytahtı Abu-Dabide Ukrayina, ABD ve Rusiye eyyetleriniñ iştirakinen muzakerelerniñ ekinci künü başlandı, dep bildirdi fevralniñ 5-nde saba Milliy telükesizlik ve mudafaa şurasınıñ kâtibi Rustem Umerov.
"Tünevinki kibi aynı formatlarda çalışamız: üç taraflı mesleatlar, gruppalarda iş ve qararlarnıñ sinhronizatsiyası", – dep yazdı Umerov Telegram kanalında, neticelerni taqdim etmege vade etip.
ABD devlet kâtibi Marco Rubio muzakerelerniñ birinci kününden soñ Ukrayina ve Rusiye arasında barışıq añlaşmasınen bağlı açıq meseleler cedveli eksildi, amma eñ "zor" meseleler qala, dep bildirdi.
Milliy telükesizlik ve mudafaa şurasınıñ kâtibi Rustem Umerov üç taraflı formatta munaqaşalarnı "mündericeli ve semereli" dep adlandırdı.
Ukrayina eyyetiniñ erkânına Rustem Ümerov, Kirill Budanov, David Arahamiya, Sergey Kislitsa, Andrey Gnatov, Vadim Skibitskiy ve Aleksandr Bevz kirdi.
Amerika tarafından mesleatlarda Steve Witkoff, Jared Kushner ve Josh Gruenbaum, Daniel P. Driscoll ve general Alexus Grynkewich iştirak eteler. Rusiye tarafı yüksek arbiy seviyede taqdim etildi.
Rusiyeniñ Ukrayinağa qarşı kütleviy darbesinden soñ Ukrayina prezidenti Volodımır Zelenskıy fevralniñ 3-nde "muzakere taqımınıñ işi keregi kibi tüzetilecek", dep bildirdi.
Kremlniñ matbuat kâtibi Dmitriy Peskov fevralniñ 4-nde saba jurnalistlerge Rusiyeniñ muzakerelernen bağlı qararı deñişmey, ve "em Kyivke, em Amerika muzakerecilerine tam belli", dep ayttı.
Yanvarniñ 28-nde ABD devlet kâtibi Marco Rubio topraq meselesi çezilmey, dep ayttı. Rusiye Ukrayina Silâlı quvetlerinden zapt etmegen Donetsk vilâyetiniñ o qısmından ordusınıñ çıqarılmasını talap ete.
Yanvarniñ 25-nde Ukrayina prezidenti Volodımır Zelenskıy Vilnüs ziyareti vaqtında Kyivniñ topraq qararı deñişmey, uzlaşuvlarğa ise bütün taraflar azır olmalı, dep ayttı. O, ABD ile eki taraflı telükesizlik kefaletleri "100%" azır ve Kyiv imzalanmasını bekley, dep qayd etti.
Zelenskıy dekabr ayında topraq qararları meselesini Ukrayina halqı "saylavlar ya da referendum formatında" çezmeli, dep bildirdi.
Aynı vaqıtta Kreml Ukrayina içün ğarbiy telükesizlik kefaletlerini red etmege devam ete ve cenkte maksimalist maqsadları olğanını köstere, dep qayd etken edi ISW talilcileri.
NATO baş kâtibi Mark Rutte fevralniñ 3-nde Ukrayina parlamentinde çıqışta bulunıp, Rusiyeniñ gece ücümleri Moskvanıñ barışıqqa ciddiy baqmağanını köstere, dep ayttı.