Ukrayına tahqiqatınıñ malümatına köre, Ablayev qırımtatarlarnı faal bir şekilde Rusiye Silâlı quvetlerine qoşulmağa davet etken edi.
«Kreml emrinen Ablayev kütleviy tedbirler teşkil etim, qırımlılarnı Rusiye işğalci gruppirovkalarına celp etmege tırıştı», – dep haber ete Ukrayına Silâlı quvetleriniñ matbuat hızmeti.
Bundan ğayrı, Ukrayına telükesizlik hızmeti bildirgenine köre, Ablayev Rusiye telekanallarında çıqışta bulunıp, Rusiye silâlı istilâsına qoltutqan ve Rusiye arbiy cinayetlerini aqlağan edi.
«Kremlge qarşı çıqqanlarnı ve Ukrayına tarafında cenkleşken qırımtatarlarnı «açıq bir şekilde» takbih etti», – dep qoşa Ukrayına telükesizlik hızmeti.
Ukrayına telükesizlik hızmetiniñ tedqiqatçıları toplağan deliller esasında mahkeme Ablayevni 436-2 maddesiniñ 3-ünci qısmı (Rusiye Federatsiyasınıñ Ukrayınağa qarşı silâlı istilâsını aqlav) ve 111-1 maddesiniñ 6-ncı qısmına istinaden (satqın işbirlikçilik) qabaatlı tanıldı. Ablayev 12 yılğa üküm etildi.
2023 senesi oktâbrniñ 21-nde Emirali Ablayev Qırım ve Aqyar musulmanları diniy idaresiniñ Rusiye müftisi olaraq kene saylandı.
Bundan evel Qırım Muhtar Cumhuriyetiniñ prokuraturası Ablayevge kollaboratsion faaliyetinde şübheli olğanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
