Amerikadaki Çikago şeerinde ve Rusiye paytahtı, Moskovada sentâbr 24-ünde faalciler, Rusiyeniñ Ukraina ve Suriyede tecavuzını toqtatmaq talabınen bir sıra piketler keçirdi. Aynı zamanda ukrain siyasiy mabüslerni, hususan Oleg Sentsov ve Vladimir Baluhnı, azat etmek talabı da yañğıradı. Bu eki taraflı aktsiyalar aqqında Qırım.Aqiqatqa faalci Vera Lavreşina aytıp berdi.
Faalciler qayd ete ki, Rusiyede ükümsürgen “rejim”niñ tecavuzını toqtatmaq ve bu vaqialarnıñ halqara mahkemede baqıluvını yaqınlaştırmaq tek “küçlerni birleştirip” yapmaq mümkün.
“İşanamız ki, özümizge, küçümizge inançnı coymasaq, şimdilik şübeli körünse de, amma yaqın vaqıtta vaziyet deñişecegine inansaq, mıtlaqa muvafaqiyetke irişerik”, - dedi Lavreşina.
Baluh, 2018 senesi martnıñ 19-ında ilân etken müddetsiz açlıqnı devam etmekte. Mabüsnıñ bir ay iç aş aşamağanından soñ, Qırım arhiyepiskopı Kliment, onı iç olmadan 2 stakan cılap kiseli, 50-70 gramm qara ötmek peksimeti ve ballı çaynı içmege qandırdı, böylece onıñ ölmemege küçü yetecek.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilan etken edi. O, mayısnıñ 31-nde «onı deñiştirüv meraqlandırmağanı» bildirdi, çünki o «soñuna qadar baracaq insan olğanını» ilân etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
