Amerikada COVID-19 hastalığından eñ çoq zarar körgen New York ştatında koronavirus sebebinden vefat etkenlerniñ sayısı aprelniñ 14-nde bir kereden arttı. Memurlar bu yuqunçnen bağlı ola bilecek ölümlerni qoştı, dep haber ete Azatlıq Radiosı.
3778 vefatqa «ihtimallı» COVID-19 qurbanları qoşuldı, olar evde ya da hastahanede diagnozını beklegende can berdi. Malümat vefat etkenlerniñ koronavirus sebebinden başlağan COVID alâmetlerine esaslana: öksürik, sıtma ve zornen nefes aluv.
New Yorkta vefat etkenlerniñ sayısı 10 biñden çoq oldı, dep bildirdi şeerniñ tibbiyet departamenti.
Yañı ölümlerniñ aman-aman 60%-ı hastalar tibbiy müessiselerde diagnozaları tasdıqlanacağını beklegende oldı. Daa 22%-ı evde vefat etti, 18%-ı qartlar evinde ya da ümütsiz hastalar müessisesinde öldi.
New Yorkta yañı esaplav usulı siyasetni diger ştatlarda da deñiştire bile, böylece, memlekette vefatlarnıñ sayısı arta bile.
New Yorkta esaplav usulı deñiştirilmezden evel ABDde bir künde, aprelniñ 14-nde, qayd etilgen vefatlarnıñ sayısı 2228 oldı, bu bir kün içinde rekord oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
