New Yorkta yanvarniñ 30-ında faaller, 2014 senesi Qırımnıñ ilhaqına qol tutqan Rusiye jazzmanı İgor Butmannıñ kontsertine qarşı narazılıq kösterdi.
Bunı Qırım.Aqiqatqa jurnalist Yuliya Gorodetskaya haber etti.
Faaller "Qırım - bu Ukraina", "Blue Note utan", "Putinniñ notalarına köre çalma", "Putin, ellerini Ukrainadan çek", "Rusiye propagandasınıñ virusını toqtatıñız" ve başqa yazılar ile tura edi.
Butmannıñ Blue Note klubunda dört kontserti planlaştırılğan. Gorodetskaya, faaller daa üç kün devamında Butmannıñ er kontserti vaqtında klubnıñ binası yanında toplaşacaq olganlarını aytıp berdi.
Yuliya Gorodetsayanıñ aytqanına köre, faaller klubğa mektüpler yaza edi, amma olarğa kimse cevaplanmadı. Ve teşkilciler ya da Butmannıñ vekillerinde kimse aktsiya vaqtında olarnıñ yanında kelmedi.
Daa evel Butmannıñ Bostonda bir qaç kontsertini lâğu ettiler. Arts Against Aggression teşkilâtınıñ faalleri, müessise reberligine çalğıcınıñ siyasiy noqta-i nazarı aqqında haber etkeni içün, onıñ soñki kontserti lâğu etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
