Nevbetler az, qabarcılıq ise iç yoq, dep işandıra Çaplınkadaki yañı memuriy hızmet merkeziniñ hadimleri. Nezaketli mütehassıslar, tez hızmet, yımşaq divanlar, zemaneviy tehnika ve balalı ana-babalar içün qolaylıqlar. Bu mesken yerde, işğal etilgen Qırımnıñ memuriy sıñırı civarlarında, on biñge yaqın insan yaşay, eñ çoq kelgen musafirler – qırımlılar. Mütehassıslar id kartları, çetel pasportları, aydavcı şeadetnameleri ve topraq damartılarını resmiyleştire, yüz yetmişten çoq hızmet köstermekte.

«Çoqusı allarda qırımlılar mal-mülkini resmiyleştirmek ve devlet migratsion hızmetlerini almaq içün, yani – id kartları, çetel pasportları içün muracaat ete», – dep ayta Çaplınka cemiyetiniñ Memuriy hızmetler merkeziniñ yolbaşçısı Aleksandr Şulga.

Memuriy hızmetler merkezi bu küçük qasabada yaratıp olğan şaraitlernen ğururlana. Donatuv ve hadimlerniñ oquşına Avropa ortaqları para berdi, tamir işleri ise cemiyetniñ parasına yapıldı.

«Küçük balalı analar içün qundaqlav masası bar, pek oñaytlı. Endi çapqalağan balaçıqlar içün de küçük köşe bar, mında pencere ögünde bala masası başında otura bile, resim yapmaq, boyamaq imkânları bar, qarandaşlar bar», – dep köstere Çaplınka cemiyetiniñ Memuriy hızmetler merkeziniñ inspektorı Nina Gileviç.

Qırımlı Valentina esas Ukrainada topraq ve evni resmiyleştirmek içün yarımadadan aman-aman 20 kilometr uzaqqa keldi – Çaplınkağa. Valentina hızmet seviyesini ve merkezniñ özüni maqtay, amma qasabada qalacaq yer yoq, dep şikâyet ete. Qırımdan Çaplınkağa bir kere kelmek içün tahminen üç biñ ğrıvnâ sarf ete.

«Olmaycaq şey. Adamlarnıñ qalacaq yeri yoq. Benzinge (memuriy sıñırğa maşinamnen ketem) 1000 ruble ya da 500 ğrıvnâ masraf etem. Mında şahsiy maşina tutamız – bu da 500 ğrıvnâ civarlarında. Aşamaq da kerek. Gecelemege qalsaq, 3000 ğrıvnâğa çıqa», – dep ayta Valentina.

Qasabanıñ yekâne musafirhanesi qapalı, daire kirası künde 200 ve atta 500 ğrıvnâ ola, dep tarif ete yerli sakinler. Mında qırımlılar rastkelgen qıyınlıqları aqqında çoq insan bile.

«Meselâ, evlenüv dairesinde vesiqa alalar, ertesi künü onı, misal olaraq, köç hızmetine bermek kerek. Yani insanlar bir kün bekley. Qayda ketsinler? Musafirhane qapalı, hostel yoq. İnsanlar bir qaç kere anda-mında ketmege mecbur», – dep tarif ete Çaplınka sakini Vladimir.

Merkezniñ saytı bar, şimdilik online yazılmağa imkân yoq, amma telefon etip, ne vaqıt muracaat etilecegini soramaq mümkün. İş künleri mütehassıslar saat 16.00-ğa qadar çalışa, cumaaqşamı künü mında iş saatları uzatıla. Bazarertesi, salı ve cuma künleri çoq ziyaretçi ola, dep ayta Merkezniñ yolbaşçısı Aleksandr Şulga.

Saymaq mümkün: Aqyar sakini, saat 6:00-da cemaat naqliyatınen yolğa çıqsa, mında qapanmasına 2-3 saat qalğanda kelir. Kene de Çaplınka yolu Hersondan 130 kilometr daa qısqa. Mında Herson merkezinde sıq-sıq olğan nevbetler de yoq.

Qırımlılar içün Avropa standartları

Esas Ukraina qırımlılarnı qabul etmege ve memuriy meselelerde yardım etmege azır, bunıñ kibi şaraitler yaratıla. Böylece, dekabrniñ 19-nda Qırımnıñ memuriy sıñırındaki «Kalançak» keçiş noqtasında hızmet alanı açıldı. Artıq mında da avtostantsiya, poçta ve memuriy hızmetler merkezi çalışacaqlar.

«Medeniyet mında keldi. Avropa integratsiyası – devletler aqqında degil, Avropa integratsiyası – insanğa lâyıq bir munasebet. Böyle servis merkezleri qurulğanda Avropa integratsiyasınen oğraşamız. İnsanlar içün çalışamız, insanlarnıñ ihtiyaclarına köre çalışamız. Emin oluñız, bir kün bu insan munasebetlerini vaqtınca işğal etilgen topraqlarğa da taşıycaqmız», – dep qayd etti Ukraina baş naziriniñ Avropa integratsiyası meseleleri naziri Dmıtro Kuleba.

Memuriy sıñırdan keçkenler rusiyelilerniñ kontroli altında keçiş noqtasını ve tamir etilgen Ukraina keçiş noqtasını qıyaslaylar.

«Mında şimdi daa yahşı oldı. Anda avtovokzal yoq da ve yanına barıp olamaysıñ – işaret asıldı. Bu yañlış, yaqınlaşmaq içün yer olmalı», – dep qayd ete Boris.

«Nege şaşasıñız?! Bu Avropa örnegi, dep tüşünem. Ukrainanıñ Avropa seviyesine kelgeni quvandıra. Eskiden rusiyelilerniñ daa yahşı edi, şimdi mında yahşı», – dep ayta Tatyana.

«Kalançak» keçiş noqtasındaki memuriy hızmetler merkezi 2020 senesi yanvar ayında işke başlaycaq. Mında ellige yaqın hızmet almağa mümkün olacaq – Çaplınkada olğanından üç qat az. Ukraina baş naziriniñ muavini Dmıtro Külebanıñ qayd etkenine köre, Ukrainanıñ maqsadı – Avropa standartlarını işğal etilgen Qırım sakinlerine qadar taşımaqtır.

2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».