İsrail baş naziri Binyamin Netanyahu parlamentte çıqışta bulunıp, Gazzeniñ cenübindeki Refahta onlarnen filistinliniñ ölümine sebep olğan qaçaqlar lagerine qarşı darbe «facialı bir tesadüf» olğanını tanıp, cenkni «bütün maqsadlarğa irişilgenine qadar» devam ettirmege söz berdi.
«Hamas» gruppirovkasınıñ kontroli altında bulunğan Gazze Sağlıq nazirliginiñ malümatına köre, mayısnıñ 27-ne keçer gecesi İsrail ordusınıñ Refahqa qarşı darbesi vaqtında eñ azından 45 insan can berdi, yüzlernen kişi yaralandı.
Netanyahu böyle bir hatanıñ sebebini aytmadı. İsrail arbiyleri başta «Hamas» (ABD ve Avropa Birliginde terror teşkilâtı dep tanılğan) kompleksine ava darbesini endirip, gruppirovkanıñ eki yüksek rutbeli azasını öldürdi, dep bildirdi. Darbe tafsilâtları ve çıqqan yanğın aqqında belli olğan soñ arbiyler barışıqsever sakinlerniñ ölümi tahqiq etile, dep aydınlattı.
İsrailniñ Refahqa qarşı darbesi halqara toplulıqlar, hususan gumanitar teşkilâtlar, BM ve AB tarafından takbih etildi. Avropa Birliginiñ diplomatiya yolbaşçısı Josep Borrell bildirgenine köre, İsrail Refahqa qarşı ücümni toqtatmağa emir etken BM mahkemesiniñ qararını ürmet etmeli.
BM Telükesizlik Şurası salı künü acele toplaşuv keçire, dep bildire AFP agentligi. «Qapalı qapu artında» körüşüv keçirilüvini al-azırda Telükesizlik Şurasınıñ daimiy olmağan azası Cezair talap etti.
ABD Milliy telükesizlik şurası Refahqa qarşı darbeniñ «bozucı levhalarını» «can sıqıcı» dep adlandırdı. Şuranıñ beyanatında ABD İsrail arbiylerinen ve diger teşkilâtlarnen olıp keçkenlerge qıymet kesüv üzerinde çalışa, dep aytıla.
Frenkistan prezidenti Emmanuel Macron daa sert olıp, İsrailden bu operatsiyalarnı toqtatmasını talap etti. «Refahta barışıqsever sakinler içün telükesiz rayonlar yoq. Men halqara uquq ve ateşniñ acele toqtatıluvına riayet etilmesine çağıram», – dep yazdı Macron X içtimaiy ağında.
Ateş toqtatıluvı ve «Hamas» tutqan reinelerniñ azat etilüvi ıntıluvlarında esas aracı Qatar bildirgenine köre, Refahqa qarşı darbe «Hamasnıñ» qaviy barışıq ve İsrail ordusınıñ çıqarıluvı talapları sebebinden zaten toqtağan muzakerelerni «zorlaştıra» bile.
İsrail bildirgenine köre, cenk qanunlarına riayet etmek içün elinden kelgenini yapa, amma bir mecburiyetini almağan, Gazzeniñ vatandaş rayonlarına ve İsrail reinelerini şartsız azat etmege razı olmağan duşmannen qarşılaşa.
İsrail Gazzede «Hamasnıñ» 2023 senesi oktâbrniñ 7-nde memleket cenübine qarşı ücümine cevap olaraq arbiy operatsiyanı keçire. O vaqıt 1200-den çoq barışıqsever sakin öldürildi, 250-den çoq insan esir alındı ve Gazzege çıqarıldı. Kampaniyanıñ maqsadı olaraq «Hamas» bütünley yoq etilüvi» ilân etildi. Gazzeniñ cenübinde Refah «gruppirovkanıñ soñki tayançı» dep adlandırıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
