Qırım Muhtar Cumhuriyetiniñ prokuraturası «Qırım tarihı» Rusiye mektep dersliginiñ basıluvı sebebinden qırımtatar halqına qarşı milletlerara nefret doğurılğanından cinaiy tahqiqat başlattı.
Müessiseniñ matbuat hızmeti mayısnıñ 14-nde bildirgenine köre, Qırım aq qorçalayıcı gruppasınıñ arizası esasında Ukraina Ceza kodeksiniñ 161-inci maddesiniñ 1-inci qısmına istinaden «nefret tili qullanılmasınen qırımtatar halqına qarşı milletlerara nefret doğurğanınıñ milliy ayırım alâmetleri olğan «Qırım tarihı» dersliginiñ basılmasında olğan millet, ırq ya da din duşmanlığı ve nefreti, milliy namus ve itibarnı aşalav areketleri» sebebinden cinaiy tahqiqat başlatıldı.
QMC prokuraturasınıñ malümatına köre, işbu derslikte Ekinci cian cenki vaqtında «qırımtatar halqınıñ vekilleri kollaboratsionist faaliyetine başqa etnik gruppalarına köre daa faal qoşuldı» ve «sürgünlik yerlerinde qırımtatarlarğa bedava aş, topraq damartıları ve mesken qurucılığı içün maddiy yardım berile edi», dep aytıla.
«Al-azırda qayd etilgen cinayetniñ işlenmesine alâqası olğanlarnı tapmaq içün tedbir alına ve derslikniñ lingvistik ekspertizasınıñ belgilenmesi ile bağlı mesele çezile», – dep aytıla haberde.
2019 senesiniñ başında Rusiye işğal etken Qırımda Qırım tarihı dersligi qavğa çıqarğan edi. Qırımnıñ sanat ve tasil saasınıñ hadimleri, adliyeciler Kreml kontrolindeki Qırım tasil nazirine muracaat etip, 10-uncı sınıflar içün S. V. Yurçenko muarririyetinde çıqqan «Qırım tarihı» Rusiye dersligini qullanuvdan çıqarmasını rica etti. Derslikte Ekinci cian cenki vaqtında «tatar ealisiniñ ekseriyeti almanlarğa yahşı yanaşqan, çoqusı faal sürette yardım etken edi» dep yazılğan.
Bunıñ kibi muracaatnı Qırım akimiyetine Kreml kontrolindeki Qırımtatar şurası da yolladı. Şura derslikte qırımtatarlarnıñ Ekinci cian cenkinde iştiraki ve 1944 senesiniñ sürgünligi aqqında berilgen malümatqa açuvlandı.
Bundan soñ mektep kütüphanelerinden derslikler qaytarılıp alındı. Martnıñ 25-nde Qırım tasil nazirliginiñ adliyeci Lenura Yengulatovanıñ muracaatına bergen cevabında 10-uncı sınıf talebeleri içün «Qırım tarihı» dersligi yarımada mekteplerinde qullanılmay, dep haber etilgen edi.
Mayısnıñ 11-nde haber etilgeni kibi, Qırım akimiyeti tarih dersliginiñ qavğa çıqarğan saifelerini «yapıştırmağa», «boyalamağa» ve «kevsim almağa» qarar berdi.
