Halqara ana tili künü munasebetinen Nefes cemaat teşkilâtı er yıllıq qırımtatar tili online imlâsını keçire. Diktant Nefesniñ Facebook saifesinde Aqmescitten canlı yayında ötkerile.
İmlânı qırımtatar şairesi, yazıcı Seyare Kökçe oquy.
İmlânı istegen er kes yaza bile, yaşı, milleti, yeri ve yaşağan memleketi, qırımtatar til seviyesi müim degil. Diktant elnen, oqunaqlı, latince ya da kirilce (istegiñizge köre) yazılmalı. Diktant bitken soñ, onıñ metni em latin urufatında, em kiril urufatında derc etilecek.
«Online imlânıñ esas maqsadı belli bir insannıñ savatını teşkermek degil, qırımtatar tiline qoltutmaq içün umummilliy ve halqara aktsiyanı keçirmek ola. Böyle aktsiya aynı vaqıtta 2019 senesi dekabrniñ 18-nde BM Baş Assambleyası 74/135 Qararınıñ «Tamır halqlarnıñ aqları» ilân etken Halqara dünya tamır halqları tilleriniñ on yılınıñ (2022 – 2032) maqsadları ve vazifelerine uyğun kele», – dep aytıla teşkilâtnıñ saifesinde.
