Cumaertesi künü, noyabrniñ 19-nda, işğalden azat etilgen Hersonğa Kyivden ilk yolcu treni keldi. Bu sefer Rusiyeniñ Ukrayınağa qarşı büyük cenki başlağanından birinci oldı, dep yaza «MOST» yerli neşiri.
Rusiye işğalcilerinden azat etilgen şeerge «Ğalebe biletini» alğan 200 yolcu keldi.
Neşirniñ malümatına köre, trende Hersonğa mektüp ve yollanmalarnı ketirgen poçta vagonı da bar.
Rusiye Ukrayınağa büyük ücüm başlatqan fevralniñ 24-nden berli Hersondan trenler qatnamay edi. Şeer işğali vaqtında şeerde ne cedvelge köre seferler, ne uruşlar devam etken diger regionlardan tahliye trenleri olmadı.
«Ukrzaliznıtsâ» Kyivden Hersonğa tren seferlerini başlattı – birinci tren noyabrniñ 18-nde paytahttan saat 22:14-te çıqtı.
Trenler Kyivge çift künlerde, Hersondan ise tek künlerde areket etecek.
«Ukrzaliznıtsâ» Aqyar treniniñ hayriye bilet satışını başlatqan edi.
«Ukrzaliznıtsâ» Herson, Mariupol, Donetsk, Lugansk ve Aqmescit trenleriniñ biletlerini sata. UZ malümatına köre, bilet alıp, Ukrayına Silâlı quvetlerine ve Ukrayınanıñ Rusiye ordusından azat etilecegine bir işanç timsali olaraq saqlamaq ve işğal bitken soñ qullanmaq mümkün. Trenler kene qatnap başlağan soñ, kün ve yer mesacda tarif etilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
