Ukrayına Tış işler nazirligi Rusiye mahkemesiniñ «qırımlı musulmanlar davasınıñ» mabüsi, qırımlı Amethan Abdulvapovğa martnıñ 15-nde bergen 10 yıl ve 6 ay apis cezasını izaatladı.
«Abdulvapov, diger qırımtatarları kibi, «Hizb ut-Tahrir davası» çerçivesinde tutuldı, bu dava Rusiye işğalci memuriyetiniñ Qırım Muhtar Cumhuriyetinde fikir ve din kütme serbestligini yoq etmek içün yapılğan repressiv kampaniyası», – dep aytıla haberde.
«Qayd etemiz ki, Qırımda insan aqları vaziyeti fenalaşa, bu işğalcilerniñ yarımadada tirenüv areketine qarşı qorqusı», – dep qoştı nazirlik.
Diplomatik müessise dünya toplulığını «bütün Ukrayına vatandaşlarınıñ azat etilüvi içün Rusiyege qarşı basqını quvetleştirmege devam etmege», Ukrayına vatandaşlarınıñ taqip etilüvine alâqası olğan şahıslarğa qarşı sanktsiya kirsetmege çağırdı.
Tış işler nazirligi Rusiyeni BM Baş Assambleyasınıñ 2022 senesi dekabr ayında ve 2023 senesi fevral ayında alınğan qararlarını yerine ketirmesine ve qanunsız tutulğan yarımada sakinlerini azat etmesine çağırdı.
Amethan Abdulvapov 2022 senesi fevral ayında Rusiye tintüvlerinden soñ tutuldı. O vaqıt Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terrorist tanılğan, amma bir çoq memlekette milliy qanunlar seviyesinde sıñırsız çalışqan «Hizb ut-Tahrir» siyasiy firqasında iştirak etkeninde qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
