Ukraina medeniyet, gençlik ve sport naziri Volodımır Borodânskıy, Rusiye işğal etken Qırımğa ve Kyiv kontrol etmegen Donbasnıñ qısmına yayın yapmaq prioritet ola, dep bildirdi.
«Birinci prioritet vaqtınca işğal etilgen topraqlarğa yayın yapmaq ola: Qırım, Donetsk ve Luganskta yaşağan insanlarımızğa ukrain noqtaiy nazarınıñ keyfiyetli bildirilüvi. Ekinci prioritet – malümatımıznı dünyağa bildirmek», – dep qayd etti nazir.
Onıñ aytqanına köre, bunıñ içün devlet elindeki resurslarnı – deñiştirilecek UATV telekanalı, «Ukrinform» milliy haber agentligini qullanacaq ve Cemiyet yayınlarını faal celp etecek.
Onıñ qayd etkenine köre, al-azırda çetel seyircilerine Ukraina noqtaiy nazarını bildirmek içün qurulacaq platformanen bağlı mesleatlar Ukraina milliy cemiyet teleradiokompaniyası ve «Ukrinformnen» keçirile.
UATV halqara yayın ukrain telekanalınıñ ingliz ve qırımtatar tilli muarririyetleri işini toqtattı. Telekanal, Ukraina akimiyeti halqara yayınnı toqtatmağa qarar aldı, dep hatırlattı.
Ukraina memurları, 2020 senesi fevral ayında UATV esasında Ukraina akimiyeti kontrol etmegen topraqlar içün rus tilli telekanal açılacaq, dep ilân etken edi.
