NATO uçaqları Qırım üzerinde uçıp başlağan kibi olsa, bu yarımadanıñ işğal etken Rusiye ile ciddiy çatışuvğa sebep olacaq, dep saya «Yevro-patrul» cemaat teşkilâtınıñ uçaq mütehassısı Vâçeslav Konovalov.
Bunı o, Aqmescit ava boşluğınıñ alyans tarafından qullanması aqqında Ukrainanıñ teklifini tefsir etip Qırım.Aqiqatqa dedi.
«Rusiye bu teklifler sebebinden endi yayğara qopardı. Biz 40 dane ğarbiy uçaqnı öz sınırlarmızda basıp aldıq, dep haber eteler», ‒ dep qayd etti Konovalov.
Alyans reberleri razılıq berseler, NATO uçaqları Qırım yanında ava koridorlarını devriye etecekler.
«Qırım üzerinden uçmacaqmız, çünki böyle areketler ciddiy çatışuvğa sebep olacaq, lâkin Qara Deñiz akvatoriyası üzerinde ruslarnı bastırmaq içün uçacaqmız. Olar NATOnıñ bu areketini qabul etseler, o diger tış uçaq şirketlerge öz marşrutlarını biraz deniştirmege signal berecek. Ebette, uçaqlar Qırımğa pek yaqın uçmacaqlar. Çünki Malaziya Boing faciası tekrarlarlana bile», ‒ dep saya ava mütehassısı.
Şimdiki vaqıtta yolcu uçaqları Ukrainanıñ cenübi ve şarqından uzaq turalar.
Tafsilâtlıca Qırım.Aqiqatnıñ yañı leyhasında.
Ukraina Rusiye ile sıñır boyu ava vaziyetiniñ nezaret etilmesinde NATO-nıñ destegine ümüt ete. Memleket NATO ava ameliyatları içün Ukrainanıñ suveren toprağı ve Qara deñizniñ açıq suvları üzerindeki Aqmescit uçuş malümat bölgesiniñ ava boşluğını qullanmağa teklif etti. Anda ava areketi hızmetleri içün mesüliyetni halqara añlaşmalarğa köre devletniñdir.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
