NATO, Ukrainağa kösterilgen arbiy yardımnı kenişletmege çağıra. Bu aqta arbiy-siyasiy ittifaqnıñ baş kâtibi Jens Stoltenberg Brüsseldeki matbuat konferentsiyasında bildirdi, dep haber ete Azatlıq Radiosı.
Stoltenbergniñ aytqanına köre, Ukrainağa qoltutuv meselesi eñ yaqın eki künde mudafaa nazirleriniñ körüşüvinde baqılacaq. O, NATO şimaliy-atlantik şurasınıñ azaları bir aftadan soñ Ukrainanı ziyaret etecek, dep qoştı. Ekspertler Odesa ve Kyivni ziyaret etip, Ukraina ordusınıñ vaziyetine qıymet kesecek.
Stoltenberg, Rusiye ve Türkiyeniñ Suriye-Türkiye sıñırını beraber patrual eteceklerine dair soñki añlaşmalarını izaatlap, qıymet kesmek içün daa erte, dep qayd etti. NATO baş kâtibi taraflar zıddiyetni siyaset yolunen al etmege tırışqanı içün ümüt bar, dep qayd etti.
