Qara deñizge NATO gemileriniñ kirmesi, martnıñ 21-inde keçecek Ukraina prezidenti saylavlarınen bağlı degil. Bu hususta, NATO-nıñ resmiy vekiliniñ sözlerine esaslanıp UNN ukrain haber agentligi bildirmekte.
“NATO-nıñ ekinci daimiy arbiy deñiz taqımı, “Deñiz qalqanı 2019” (Sea Shield 2019) azırlanaraq, şimdi Qara deñizde devriye yapa”, - dep belgiledi NATO vekili.
Resmiy vekilniñ aytqanına köre, manevrlerge çoqtan berli azırlıq başlanılğan edi.
“Bu, Romaniya er yıl keçirgen idman. Ne devriye, ne de manevrler Ukraina vaqialarınen bağlı degil. Üç dostane memleketniñ Qara deñiz ile sıñırı bar ve NATO muntazam sürette Qara deñizde arbiy idmanlarnı kecire”, - denile beyanatta.
Qara deñizge №2 NATO Daimiy mina qarşı gruppasınıñ flagmanı kirecek, Almaniya Arbiy Deñiz Quvetleriniñ FGS Werra (А 514) gemisi. Bu aqta fevral 15-inde “Çetel işler maydanı” közetüv gruppası, “Qara deñiz strategik tedqiqatlar İnstitutı” ve BlackSeaNews muarrireti bildire.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
