NATO baş kâtibi Yens Stoltenberg Rusiye prezidenti Vladimir Putinni keleyatqan bayramlar arfesinde Ukraina sıñırlarından ordusını keri çekmege çağırdı. Bunı, o, dpa alman haber agentligine bildirdi.
Onıñ sözlerine köre, Rusiyeniñ er kes içün tınç ve sakin Milât bayramını temin etmek imkânı bar, bunıñ olması içün o, kerginlikni eksiltmeli ve ordusını keri çekmeli.
NATO baş kâtibi bildirgeni kibi, Rusiye on biñlerce arbiyini Ukraina sıñırında topladı.
"Bu, emiyetli bir arbiy arttırıluv ve toqtaycağına ya da sakinleşecegine dair iç bir alâmt yoq", - dep qoştı o.
Stoltenberg quvetlerniñ avuşmasınıñ ilk nevbette Rusiyeniñ NATO-dan telükesizliknen bağlı uzlaşma talap etmek ıntıluvı olğanından şübelengeni sualini açıq qaldırdı.
"Rusiyeniñ niyetleri ile bağlı bilinmemezlik bar", - dedi o.
Kremlniñ NATO-dan "qoşma telükesizlik kefaletler" talabına kelgende, Stotenberg laf etmege azır olğanını bildirdi. Amma, NATO-nıñ, misal olaraq, Ukrainanıñ Alyansqa qabul etilmesini lâğu ete bilecegi fikrini red etti.
Dekabrniñ 23-nde Rusiye prezidenti Vladimir Putin matbuat konferentsiyası vaqtıda, NATO memleketleri Alyansnıñ keñişlemesi ile bağlı "deral" kefalet berilmelidir ve Rusiyeniñ areketleri muzakerelerge degil, buña bağlı olacağını bildirdi.
Soñki aftalar Rusiye Ukraina sıñırlarında arbiy bulunuvını keskin şekilde arttırıp başladı. Ukraina istihbaratı ve Ğarp memleketleri Rusiye ordusı memleketke artıq yanvar ayında istilâ ete bilecegini bildire.
