NATO Baş kâtibi Jens Stoltenberg Rusiye FSBsi tarafından 2018 senesi Qırım yalısında zapt etilgen arbiy katerler ve buksirniñ Ukrainağa keri qaytarılmasını alğışladı. Onıñ fikirince, bu, Minsk añlaşmalarını yerine ketirmege yardım ete bile.
Bu aqta Stoltenberg, Brüsselde olacaq alyans memleketleri tış işler nazirleriniñ eki künlik toplaşuvı ögüne matbuat konferentsiyasında ayttı, dep bildire UNIAN agentligi.
«Zapt etilgen Ukraina gemileriniñ qaytarılmasını tebrikleyim. Rusiye bunı çoqtan yapmaq kerek edi», – dedi Stoltenberg.
NATO Baş kâtibi, NATO, «Azaq deñizinde ve Keriç boğazında gemilerniñ raat keçmesine keder etmeycek Rusiyege işaret bere», dep bildirdi.
Bazarertesi künü, noyabrniñ 18-nde, bir yıl evelsi Qara deñizde Keriç boğazı yanında zapt etilgen «Nikopol», «Berdânsk» ukrain katerleri ve «Yañı Qapu» buksiriniñ Rusiye tarafından qaytarıluv esnası başlatıldı, dep bildirdi Ukraina Arbiy-deñiz quvetleriniñ komandanlığı. Bundan evel ukrain gemileriniñ Ukrainağa qaytarılması aqqında Rusiye Tış işler nazirligi bildirgen edi.
Ukraina Silâlı quvetleri Arbiy-deñiz quvetleriniñ komandanı İgor Voronçenkonıñ malümatına köre, gemiler Qırımdan noyabrniñ 20-21-nde kelmeli.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, berilgen malümatqa köre, üç Ukraina arbiy gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Ukraina deñizcileriniñ 6 yılğa qadar azatlıqtan marum qalması mümkün edi.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
