Ukraina Qırımnıñ işğalden qurtuluvına siyasiy yollarnen irişip olamasa, NATOnıñ kimligi altında Qırım içün cenkleşmege mecbur ola bile.
Bu aqta Qırımtatar Milliy Meclisiniñ reis muavini İlmi Umerov Azatlıq Radiosınıñ yayınında bildirdi.
«5 yıl içinde çoq şey yapıldı. İlk evelâ ordu peyda oldı. Avropa integratsiyası ve NATOğa doğru ketemiz. Diplomatik, siyasiy seviyede yapılğanlar Ukrainağa yetmese, NATOnıñ kimligi altında kendi toprağımız içün cenkleşmege de mecbur ola bilemiz. Bunı daa evel aytmamağa tırışa edim, amma soñki vaqıtları aytıp başladım, ola bilecek bir variant», – dep qayd etti Umerov.
Onıñ aytqanına köre, Ukraina Qırımnıñ işğali aqqında er imkânında aytmaq kerek, Qırım mevzusı dünyadaki kütleviy haber vastalarınıñ ilk haberlerinden ğayıp olmamalı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
