O, Rusiye mahkemesi tarafından 17 yıl koloniyada qalmasına üküm etildi.
"Narimannıñ şahsiyeti Qırım ve bütün qırımtatar halqı içün ğayet müim, onıñ qararı ise - Rusiyedeki aqsızlıqnıñ daa bir delili. İşğalcilerniñ cinayetleri aqqında açıqtan-açıq aytqanı, Qırım platforması sammitinde iştirak etken soñ işğal etilgen Qırımğa qaytqanı, Ukrayinağa sadıqlığı ve aqiqatı içün onı qanunsız şekilde 17 yıl sert rejimli koloniyada qalmasına ve 700 biñ ruble para cezasına mahküm ettiler", – dep bildirdi Taşeva.
Taşeva hatırlattı ki, mayısnıñ 19-na qadar istegen er kesniñ "Serbest Qırımğa mektüpler" teşebbüsine qoşulmaq, Nariman Celâlğa ve Ukrayina tarafdarı olğanları ve Qırımnıñ Rusiye tarafından ilhaqına qarşılıq köstergenleri içün qanunsız şekilde apiske alınğan diger siyasiy mabüslerge qoltutuv sözlerini yazmaq imkânı bar.
Aprelniñ 27-nde Nariman Celâl 44 yaşını toldurdı. 2022 senesi sentâbrniñ 21-nde Rusiye nezaretindeki Qırım Yuqarı mahkemesi, "Anğaradaki gaz borusında diversiya davası" boyunca Celâlnı sert rejimli koloniyada 17 yılğa azatlıqtan marum etip, 700 biñ ruble para cezasını ve 1,5 yıl azatlıqtan marum etüv cezasını berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
