Siyasiy mabüs, Qırımtatar Milliy Meclisiniñ birinci reisi Narmian Celâl tahqiqat tevqifhanesinde ayaqlarınıñ şişmesi ve varikoznen şekişe, dep bildirdi ömür arqadaşı Leviza Celâl.
"Onıñ alı, Narimannıñ bu SİZO-daki diger mabüsler kibi 40 kündir künde 16 saat (saba saat 6-dan aqşam saat 10-ğa qadar) yataqqa oturma ya da yatma izin berilmeden ayaqta olmasınıñ bir neticesidir", - dep yazdı o.
O, Aqmescitteki 2-nci SİZO hadimleriniñ talapları böyle şekilde RF Adliye nazirligi tarafından tasdıqlanğan qaidelerni bozğanını iddia ete.
Celâlova, bir ay soñra Rusiye tarafından teşkil etilgen Qırım ve Aqyar boyunca Federal Ceza hızmetinden Celâlnıñ başqa bir SİZO-ğa avuştırılmasınıñ sebepleri aqqında cevap alğanını bildirdi.
"Cevap beklenilgen edi, 1-nci SİZO yerler yoq eken, bundan sebep onı 2-nci SİZO-ğa avuştırğanlar. Cevapqa köre, Narimannıñ avuştırılmasınıñ maqsadı "uyğun tevqif şaraitini yaratmaq" edi eken", - dep qayd etti ömür arqdaşı.
Aqmescitteki 2-nci SİZO Rusiyeniñ Ukrayinağa qarşı büyük cenkiniñ başlamasından berli Qırımdan kelgen bildirmelerde yer alıp başladı. 366 kişilik izolâtornıñ quruluvı 2015 senesi başlanğan edi. Rusiyeniñ Ukrayinağa qarşı büyük cenki başlanğan soñ uquq qoruyıcılar bu SİZO-nıñ Rusiye tarafından vaqtınca işğal etilgen topraqlarda tutıp esir etilgen Ukrayina vatandaşları içün izolâtor kibi çalışqanını aşkâr ettiler.
Rusiye kontrolindeki Qırım Yuqarı mahkemesi 2022 senesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
