Rusiye kontrolindeki Qırım Yuqarı mahkemesi Bağçasaray rayon polisiniñ yerli mahkemeniñ «terror faaliyetine çağırğanında» qabaatlanıp 2,5 yıl Rusiye koloniyasında yatqan qırımlı vatandaş jurnalisti Nariman Memedeminovnı memuriy nezaret altına almaq talabına red cevabına qarşı istinaf şikâyetini qanaatlendirmedi.
Bu aqta «Qırım birdemligi» cemaat birleşmesi haber ete.
«Diñlevlerde davacı tarafı Memedeminov mahkümiyeti lâğu etilgenine qadar (mahkeme azat etilgenge daa 2 yıl metin derc etmege ve saytlarnı idare etmege yasaqlağan) «nezaret altında» qalsın, dep israr etti, dep bildire faaller advokat Siyar Paniçniñ aytqanlarını.
Onıñ aytqanına köre, polis memuriy nezaret qanunınıñ qaidesine ait Rusiye Ceza kodeksiniñ 205.2 maddesiniñ 2-nci qısmına esaslana.
«Faqat, Rusiye Ceza-icra kodeksiniñ 173.1 maddesine köre, böyle ariza apis müddeti bitmezden eñ az 2 ay evelsi berilmeli. Organlar ise Nariman azat etilgeninden 9 aydan soñ mahkemege muracaat etti», – dep qayd etti Paniç.
Rusiye kontrolindeki Qırımnıñ Bağçasaray rayon mahkemesi Qırımdaki Rusiye İç işler nazirliginiñ yerli bölügine Memedeminovnı memuriy nezaret altına almağa izin bermedi.
Polis, Nariman Memedeminovnıñ areket serbestligini sıñırlağan ve onı «ayda eki kere uquq qoruyıcı organlarını ziyaret etmege» mecbur etken bir sıra yasaq kirsetmege talap etti.
Memedeminovnıñ özü bunı «basqı ve taqip elementi» dep adlandırdı.
