Qırımtatar Milliy Meclisi reisiniñ muavini Nariman Celâlnı Qırımdan RF territoriyasındaki cezahanege etap ete bileler. Böyle fikirni advokat Nikolay Polozov "Gromadske radio"ğa bildirdi.
"Qırımda apis cezasına mahküm etilgen siyasiy mabüslerniñ episini "qarar quvetini alğan" soñ qıtağa etap eteler. Şunıñ içün Nariman Celâlnı da işğal etilgen Qırımdan Rusiyeniñ territoriyasına etap etecekler, dep belleyim", - dep ayttı Polozov.
Evel Rusiyeniñ Üçünci umumiy yurisdiktsiya istinaf mahkemesi Anğara köyündeki "gaz borusında diversiya" davasında RF nezareti altındaki Qırım Yuqarı Mahkemesiniñ Nariman Celâl ve ağa-qardaş Aziz ve Asan Ahtemovğa çıqarğan ükümni quvette qaldırdı.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Rusiye qabaatlavı dava mabüsleri içün 15 yıl apis cezası berilmesini talap etken edi.
Qırım Muhtar Cumhuriyetiniñ prokuraturası Rusiye kontrolindeki Qırım Yuqarı mahkemesiniñ Nariman Celâl ve ağa-qardaş Asan ve Aziz Ahtemovlarğa çıqarğan ükmüni qanunsız dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
