Almaniya Bundestagınıñ prezident muavini Katrin Gering-Ekardt Qırımda Rusiye mahkemesi tarafından 17 yılğa üküm etilgen qırımtatar siyasetçisi ve faali Nariman Celâlnı azat etmege çağırdı. Bu aqta Twitterde yazdı.
«Nariman Celâl – zenaatdaşım. Qırımtatar halqınıñ temsiliy organı – Meclis reisiniñ birinci muavini. Delillerge baqmadan, onı 17 yılğa azatlıqtan marum ettiler. Ömür arqadaşı Leviza dört kiçik balasınen onı bekley», – dep yazdı Gering-Ekardt.
Onıñ qayd etkenine köre, Celâlnıñ mahkemesi «insan aqları saasında halqara standartlarğa uymay edi».
Bundestagnıñ prezident muavini, Celâl azlıqnıñ, qırımtatar halqınıñ aqlarını qorudı, dep qayd etti ve, onıñ fikirince, Rusiye uquq qoruyıcıları onı 2021 senesi sentâbr ayında tuttı.
«BM vatandaş aqlaşması 53 yıl evelsi qabul etildi. Bu añlaşma azlıqlarnıñ medeniy aqlarını da kefil ete. Nariman Celâl bu aqlarnı ve olarğa riayet etilmesini talap ete. Men talap etem», – dep qoştı Gering-Ekardt.
Rusiye kontrolindeki Qırım Yuqarı mahkemesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Ukrayına Tış işler nazirligi, Ukrayınanıñ Qırım Muhtar Cumhuriyetindeki temsilciligi, Qırımtatar Milliy Meclisi ve aq qorçalayıcılar Celâl ve ağa-qardaş Ahtemovlarğa çıqarılğan ükümni takbih ettiler.
Qırımtatar halqınıñ lideri Mustafa Cemilevniñ Qırım.Aqiqatqa bildirgenine köre, o, Celâlnı Rusiye apsinden azat etüv meselesini Türkiye prezidenti Recep Tayyip Erdoğannen muzakere etmege niyetlene.
Avgustnıñ 23-nde «Qırım platforması» ekinci halqara sammitiniñ iştirakçileri Rusiyeni Nariman Celâlnı ve bütün qırımlı siyasiy mabüslerni azat etmesine çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
