Rusiye mahküm etken Qırımtatar Milliy Meclisiniñ reis muavini Nariman Celâl Rusiyeniñ Krasnoyarsk ülkesine etap etile, dep haber etti ömür arqadşı Leviza Celâl «Qırım birdemligine».
Onıñ aytqanına köre, Kreml kontrolindeki Qırım Yuqarı mahkemesinden haber keldi, Celâlnıñ temyiz şikâyetleri Minusinsk şeerine yollanacaq, Görkiy soq., 114. Açıq malümatqa köre, bu adreste apishane bar.
Leviza Celâl tarif etkenine köre, aqayınıñ sağlıq vaziyeti aqqında bir şey bilmey, bağ yoq. O, Nariman Celâl mahsus blokta tutula ve tuvğanlarına telefon etmege izin berilmey, dep tahmin ete.
«Narimandan bir haber yoq. Qayda buluna, ne alda, qaysı şeerde, sağlıq vaziyeti belli degil», – dep qoştı qırımlı siyasetçiniñ ömür arqadaşı.
Berilgen malümatqa köre, Aziz Ahtemov da Rusiyeniñ Minusinsk şeerindeki apishanege etap etile. Aqrabası olğan Asan Vladimirge etap etile, dep qayd etti aq qorçalayıcılar.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
