«Ukrayınağa ait Qırımda Rusiye işğalci memuriyet vaqtınca işğal başlağanından berli maqsadı razı olmağanlarnı yoq etüv olğan repressiv kampaniyanı başlattı. Repressiyalarnıñ esas qurbanlarından biri Qırımnıñ tamır halqı oldı – qırımtatarlar, yüzlernen insan etnik, siyasiy, diniy sebeplerden taqip etile», – dep aytıla Ukrayına Tış işler nazirliginiñ haberinde.
Müessise, Rusiye Federatsiyası 2022 senesi dekabrniñ 15-nde qabul etilgen ve qanunsız tutulğan bütün ukrayınalılarnı azat etmesini talap etken BM Baş Assambleyasınıñ «Vaqtınca işğal etilgen Qırım Muhtar Cumhuriyeti ve Aqyar şeerinde insan aqları vaziyeti» qararına riayet etmeli, dep israr ete.
Ukrayına Tış işler nazirligi Qırımda Rusiye işğalci memuriyeti tarafından qanunsız tutulğan bütün Ukrayına vatandaşlarınıñ tez vaqıtta azat etilmesi içün halqara toplulıqnı Rusiyege basqı yapmağa devam etmesine, Ukrayına vatandaşlarınıñ taqip etilüvine alâqası olğanlarğa qarşı yañı sanktsiyalarnı kirsetmesine çağırdı.
Belli olğanına köre, Qırımtatar Milliy Meclisiniñ birinci muavini Nariman Celâl ve Asan ve Aziz Ahtemovlar oktâbrniñ 2-nde Aqmescitteki SİZO-2-den alındı ve Rusiyedeki apishanelerge avuştırıldı.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
