Qırımda «gaz borusındaki diversiya davasına» istinaden mahküm etilgen qırımtatar siyasetçisi ve faali Nariman Celâlnıñ omurğa problemleri ağırlaştı, qullanğan ilâcları alındı ve berilmey. Bu aqta «Suspilne» bildire.
Siyasiy mabüske yatmağa da izin bermeyler, dep tarif etti ömür arqadaşı Leviza Celâlova.
Onıñ bildirgenine köre, ekimler kelmedi, tek tibbiy bölükte formal bir şekilde baqqanlar. Celâl sırt ağrısı içün ilâcını almağa istegende külüp bir şey bermediler.
«Yanğı başladı – omurğa arası diskleriniñ üç dane quyuldıqı bar. Tibbiy bölükke ilâc ya da ağrısını kesecek bir krem istegende red cevabını aldı – yanında olğan bütün vesiqa, eşya, ilâcları alınğan edi. Bir şey bermediler», – dedi o.
Celâlovnı karantin kamerasından umumiy kamerağa avuştırğanlar.
«Çoq otursa ya da tursa, ağrısı raatsız ete», – dep ayttı qırımtatarınıñ ömür arqadaşı.
Celâlova qayd etkenine köre, SİZOda tibbiy yardım kösterilmemesi – Rusiye apishaneleriniñ eñ büyük problemlerinden biridir.
«Mında (Qırımda – QA) yapmağa tırışqan bütün uquqiy areketlerimiz, muracaat, şikâyetlerimiz – er şey yapamız, amma FSB nezareti altında olğanımıznı añlaymız. Tek FSB izninen reberlik bir şey yapa bile. Olarnıñ razılığı olmasa, anda bir şey deñişmeycektir», – dep qayd etti o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
