Link açıqlığı

Saatnıñ esas haberi

Nariman Celâl BM Havfsızlıq Şurasında Qırımdaki ukrayin ve qırımtatar siyasiy mabüslerine qoltutmağa çağırdı


Nariman Celâl
Nariman Celâl

Qırımtatar Milliy Meclisi reisiniñ birinci muavini ve aq qorçalayıcılar tarafından tanılğan Kremlniñ sabıq siyasiy mabüsi Nariman Celâl BM Havfsızlıq Şurasınıñ «Arria» formatında keçirilgen toplaşuvında çıqış yapıp, halqara cemaatçılıqnı Qırımda ukrayin ve qırımtatar siyasiy mabüslerine qoltutmağa çağırdı.

Hususan, Celâl aq qorçalayıcılarnıñ malümatına esaslanıp, al-azırda Qırımdan 218 siyasiy mabüs qayd etildi, olardan 132-si qırımtatarı olğanını bildirdi. Onıñ fikirince, bu raqamlar Qırımda «tamır qırımtatar halqınıñ maqsatlı taqip etilmesini köstere».

«Lâkin bu tek buz dağnıñ töpesidir. Qırımda biñlernen ukrayin vatandaşı siyasiy repressiyalarğa oğradı. Qanunsız seferberlikniñ neticesinde biñlernen insan öz vatanlarını terk etmege mecbur oldı. Sayısı az olğan qırımtatar halqı içün bu aqiqaten büyük gumanitar felâketke teñ kele. «Menim vatandaşlarım, şu cümleden menim qoranta azalarım ve dostlarım Rusiyeniñ repressiya rejimi tarafından esir tutulmaqta», – dedi Celâl BM Havfsızlıq şurasında.

O, bu vaziyet «halqara cemiyetniñ diqqatını celp etmeli», dep qoştı.

«Eminim, böyle vaziyet halqara cemiyetniñ diqqatını celp etmeli, amma bu tarafnı mesüliyetke çekmek içün aqiqiy mehanizmler olmasa, halqara gumanitar uquqnıñ ömürge keçirilmesi imkânsız olğanını añlaysıñız. Añlaysıñız ki, Ukrayina ve qırımtatarlar yardımıñızğa muhtaclar, olar serbest ve havfsız yaşamağa isteyler. «Ukrayinağa yardım etiñiz», – dedi Celâl.

BM Havfsızlıq Şurasınıñ «Arria» formulasında toplaşuvları BM Havfsızlıq Şurası azaları olğan devletler eyyetleriniñ teşebbüsinen keçirile, bunıñ maqsadı Şura azalarına belli bir mesele boyunca malümatnı Havfsızlıq Şurasınıñ resmiy toplaşuvlarında diñlenmek imkânı olmağan iştirakçilerniñ keñ spektrinden almaq imkânını bermektir.

Qırımtatar resurs merkeziniñ malümatına köre, Rusiye Qırım yarımadasını işğal etkeninden berli 370 siyasiy sebepli cinaiy dava qayd etildi, 228-i qırımtatarlarğa qarşı. Ukrayina Yuqarı Radanıñ vekâletlisi Dmıtro Lubinets bildirgenine köre, al-azırda 218 qırımlı siyasiy ve diniy sebeplerden taqip etile.

Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG