Poloniya çiftçileri ukrayin yük maşnalarından aşlıqnıñ bir qısmını memleketler arasındaki sıñırdaki yolğa töktiler. Yerli politsiya teşkerüv keçire. Yük maşnaları Ukrainağa qayttı. Bu aqta RMF24 haber ete.
Vaqia fevralniñ 11-nde saba, Poloniya çiftçileriniñ narazılıq aktsiyası keçirilgen "Yagodin-Dorogusk'' keçiş noqtasınıñ yanında yüz berdi, dep haber ete RMF24. Politsiya vekili Helma Yeva Çijniñ aytqanına köre, Ukrayina vatandaşları olğan üç yük maşnası gümrük protsedurasından keçken soñ Poloniyağa kirdi.
''Narazılıq iştirakçileri naqliyatqa yol bermediler ve bir vaqıtları tiremelerni açtılar, bu sebepten aşlıq qısmen yolğa töküldi. Aydavcılar Ukrayina tarafına çevirdiler", - dep añlattı o.
Politsiya vekiliniñ aytqanına köre, "zorbalıq yüz bermedi". Uquq qoruyıcı organları teşkerüv keçire. Vaqia yüz bergen yerde iştirak etken insanlarnı belgileyler.
"Bizler teşkerüv keçire, adise iştirakçileriniñ malümatlarını belgiley, şaatlarnı sorğuğa çeke bilemiz", - dedi Çij. Malümat prokuraturağa cinaiy ve uquqiy ekspertiza içün berilecek.
Ukrayina haber agentligi UNİAN, Poloniya çiftçileriniñ yük maşnalarından aşlıqnı boşatmağa tırışqanlarını köstergen video yayınladı.
Poloniya çiftçileriniñ narazılıqları 2023 senesiniñ küzünden berli devam ete. Fevralniñ 9-nda memlekette umummilliy narazılıq başladı. Çiftçiler yollarnı ve Ukrayina ile sıñırdaki keçiş noqtalarınıñ kirişlerini qapatalar. Poloniya taşıyıcıları tarafından blok etilgen Ukrayina ile sıñırda keçit noqtaları ögünde nevbette 1,3 biñden ziyade yük maşnası tura, dep bildirdi fevralniñ 11-nde Ukrayina Devlet sıñır hızmetiniñ vekili Andriy Demçenko.
Esas iddia - Kıyiv içün vizasız naqliyat. O, ukrayin taşıyıcılarına AB memleketlerine taşımaları içün mahsus izin almağa kerekmeycegini bildirmekte. Ukrayina ve Avropa Birligi bu añlaşmanı Rusiye istilâsından soñ imzalap, Ukrayina iqtisadiyatına qoltuttılar. Ukrayina taşıyıcılarınıñ daa ucuz hızmetleri Poloniya bazarına ücüm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
