Advokat Ayder Azamatovnıñ bildirgenine köre, o, Qırımdaki «Hizb ut-Tahrir davasınıñ» mabüsi Eldar Kantimirovğa qarşı Rostov vilâyetindeki Rusiye Cezalarnı yerine ketirüv federal hızmeti idaresiniñ Federal devlet müessisesiniñ SİZO-1-ini nezaret etken mahsus Rostov prokuratura hadimleriniñ qanunsız areketleri sebebinden Rusiye Baş prokuraturasına şikâyet yolladı.
Advokat, er adamı namaz qılğanda SİZO hadimleri kamerağa kirdi ve onı bu sebepten 2020 senesi sentâbrniñ 17-nde 7 künge kartserge yolladı, dep hatırlattı. O, apiske alınğan kişige nisbeten «sayğısız ve evelden yañlış» munasebet bar, dep tüşüne.
«Ümüt etem ki, Baş prokuratura teşkerüv keçirip, tahqiqat izolâtorında tutulğanlarnıñ, hususan Kantimirov Eldarnıñ, aqlarına riayet etilgenini taqip etip nezaret etmek yerine özleri bu çirkin bozuvlarğa yol açqan ve vatandaşlarnıñ işançını yoq etken müessise hadimlerini mesüliyetke çekecektir», – dep yazdı Azamatov.
Kantimirovnıñ namaz qılğanı içün kartserge yollanılğanını sentâbr ayında başqa advokat Aleksey Ladin bildirgen edi.
Rusiye SİZO hadimleri Kantimirovnıñ cezasınen bağlı açıq izaat bermedi.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
