Rusiye prokurorı "Hizb ut-Tahrir birinci Canköy gruppası" davasında qabaatlanğanlarnıñ suçunı isbatlamaq içün, namaz aqqında ses yazısını taqdim etti. Bunı "Qırım birdemligi" cemaat birleşmesi bildire.
Qayd etilgenine kibi, mahkemede FSB hadimleriniñ aytqanına köre, 2015 senesi camide gizli şekilde yapılğan bir ses yazısını bir saattan ziyade diñlegenler. Anda insanlar farz namaz ve oraza meselelerini muzakere eteler.
''Namaz aqqında bir sıra meseleler muzakere etildi: namaz nasıl qılına, bunıñnen bağlı şariat qaideleri nasıl ve ilâhre. Elbette, terrorizm ve ekstremizm aqqında bir şey aytılmadı. Bu daa bir kere [müvekkillerimizge qarşı] cinaiy davalarnıñ nasıl olğanını isbatlay", - dep izaatladı advokat Emil Kurbedinov.
Mahkemeci Timur Maşukov 2024 senesi yanvarniñ 15-ne qadar mahkeme esnasında teneffüs ilân etti.
2022 senesi avgustnıñ 11-nde saba faaller işğal altındaki Qırımda Rusiye quvetçileri qırımtatarlarnıñ evlerini tinte, dep bildirdi. Advokatlarğa kirmege izin berilmedi, bazı yerlerde cep telefonı bağı söndürildi. Altı er adamı – Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyev Rusiyede yasaqlanğan «Hizb ut-Tahrirde» iştirak etkeninde qabaatlanıp tutuldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
