Ukraina Rusiyeniñ «Gazprom» şirketinden 2,9 milliard dollar aldı, dep bildire «Naftoğaz Ukrayını» şirketiniñ icra müdiri Yuriy Vitrenko Facebookta.
«E, Ukraina Stockholm akemliginiñ qararına köre «Gazpromdan» 2,918 milliard dollar aldı», – dep yazdı Vitrenko.
Dekabrniñ 20-nde Ukraina, Rusiye, Avropa Birligi ve «Ukraina gaz naqil sistemasınıñ operatorı» şirketi, «Naftoğaz» ve Rusiyeniñ «Gazprom» şirketiniñ vekilleri tranzitni saqlap qalmaq mevzusında evelden añlaştılar. Ukraina energetik şirketi Rusiye şirketine qarşı davalardan vazgeçti.
Taraflarnıñ müim añlaşmaları arasında:
- «Gazprom» dekabrniñ 29-na qadar «Naftoğazğa» 2,9 milliard dollar ödemege razı oldı, bunı Stockholm akemliginiñ 2018 senesi fevral ayında qabul etken qararı talap ete.
- Taraflar şimdilik qararı olmağan bütün davalarnı çeke, mında «Naftoğaznıñ» Rusiye energetik korporatsiyasına 12,2 milliard dollar ve 1,33 milliard metr kub gaz davası da aytıla.
- «Gazpromnıñ» aktivleri ve mülkinden tevqifler alıp çıqarıla, taraflar 2009 senesi yanvarniñ 19-nda tizilgen gaz berüv ve tranzit añlaşmalarınıñ bağlı bütün iddialardan vazgeçe.
- Bu şartlar yerine ketirilse – «Gazprom» ve «Naftoğaz» Ukraina üzerinden gaz tranziti añlaşmasını tizecekler.
