Rusiye tarafından işğal etilgen Qırımda öldürilgen Özbekistan vatandaşı Nabi Rahimovğa qarşı Rusiye Ceza kodeksiniñ 318-inci maddesine istinaden («Akimiyet vekiline qarşı zorbalıq qullanuv») cinaiy dava açıldı. Bu aqta «Qırım birdemligi» cemaat birleşmesi bildirdi.
Davada Edem Semedlâyev ve Siyar Paniç imayeci olacaqlar.
«Vefat etken kişiniñ ömür arqadaşı Sohiba Burhanova Rahimovnıñ öldürüvini ve mahkemesini tahqiq etüv aqqında bildirdi, çünki onı qabaatsız saya. Qadın onıñ qabaatsız olğanını isbatlamağa tırışacaq ve mahsus hızmetlerniñ versiyasına itiraz bildire. Tahqiqat komiteti Rusiye Federatsiyası Ceza kodeksiniñ 318-inci maddesine istinaden («Akimiyet vekiline qarşı zorbalıq qullanuv») cinaiy dava açtı. Qadın kene de Krasnodar ülkesinde çetel vatandaşlarını vaqtınca tutuv merkezinde tutula. Quvetçilerniñ «yoq etilgen terrorist» olaraq Rahimovnıñ cesedini bermeme qararı deñişmedi», – dep aytıla haberde.
Qayd etilgenine köre, dava ilk tahqiqat stadiyasında buluna.
Mayısnıñ 11-nde Aqmescitte Rusiye quvetçileri Özbekistan vatandaşı Nabi (Ayub) Rahimovnı tutqanda onı atıp öldürdi. Olarnıñ malümatına köre, adam Rusiye uquq qoruyıcı organlarınıñ hadimlerine silâlı qarşılıq kösterdi. O künü FSB, qorantasını ve Rahimov öldürilgen evniñ saibi Seydamet Gafarovnı sorğuğa alıp ketken edi.