Kremlniñ işğal etilgen Qırımda ve Rusiyede tutqan ukrainalılarnıñ azat etilüvinen bağlı muzakereler toqtamayıp keçirile.
Bu aqta aprelniñ 30-nda Ukraina prezidenti Volodımır Zelenskıynıñ matbuat kâtibi Yuliya Mendel Qırım.Aqiqat Radiosınıñ saba yayınında ayttı.
«Fikirlerimiz deñişmey, muzakereler daima keçirile. Tutulğan ukrainalılarnıñ telükesizligi maqsadınen tutulğan şahıslarnıñ (Ukraina ve Rusiye arasında – QA) eki taraflama deñişimi nasıl keçecegini aydınlatmağa istemeymiz», – dedi Mendel.
Onıñ aytqanına köre, «muzakereler deñişe» ve Prezident ofisi bu esnasnıñ tafsilâtlarını aydınlatsa, «deñişim vaqtında istenilmegen aqibetlerniñ» sebebi ola bile.
Aprelniñ 16-nda Donbasta daa bir deñişim kerçekleştirildi. Berilgen malümatqa köre, deñişim Ğorlivka civarındaki «Mayorsk» keçiş noqtası rayonında oldı, 19 Ukraina vatandaşı qaytarıldı. Prezident ofisiniñ qayd etkenine köre, Qırımda ve Rusiyede tutulğan ukrainalılarnıñ azat etilüvinen bağlı muzakereler devam ete.
Volodımır Zelenskıynıñ aprelniñ 17-nde bildirgenine köre, Rusiye ile deñişimni koronavirus sebebinden «buzlatmağa» teklif etilgen edi.
Prezidentniñ aytqanına köre, «teşkerüvden» soñ bir deñişimde yigirmi insannı da, atta «bir insan yerine birini» deñiştirmege azır.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
