Rusiye muzakere keçirmek içün "SVOda" ("mahsus arbiy operatsiya", Rusiye Ukrayinağa qarşı cenkini böyle adlandıra) pauza yapmaycaq, dep bildirdi sentâbrniñ 23-nde Rusiye Tış işler naziri Sergey Lavrov BM Telükesizlik Şurasınıñ toplaşuvında.
"Muzakerelerniñ er angi formatı vaqtında mahsus arbiy operatsiyada pauza yapmaycaqmız. Avropa bunı istey – biraz vaqıt qazanıp, Kyiv rejiminiñ azlaşqan arbiy arsenalını toldurmaq içün", – dedi Rusiye diplomatiyasınıñ yolbaşçısı.
Aynı vaqıtta Moskva Ukrayinanen bağlı uzun müddetli ve dayanıqlı qararlarda muzakerelerge azır, dep qoştı o.
Ukrayina tarafı cebe çizgisinde ateş toqtatıluvı ve eki memleketniñ infrastrukturasına qarşı darbelerniñ toqtatıluvı barışıqqa doğru ilk adım olmalı, dep israr ete.
Sentâbrniñ 23-nde BM Telükesizlik Şurasınıñ toplaşuvı ögünde aydınlatılğan elliden ziyade memleketniñ diplomatları beyannamesinde de bu aytıla.
"2025 senesi mart ayından berli Ukrayina ateşniñ tam, acele ve müddetsiz toqtatıluvına razı oldı. Rusiyeni de aynı şekilde yapmağa çağıramız, bu barışıqqa ketirgen manalı diplomatiya ve muzakerelerge doğru kerekli bir adım", – dep qayd etile Avropa Birligi vekâletli temsilcileri, aza-devletleriniñ vekilleri, Kanada, İsviçre, Gürcistan, Moldova, Avstraliya, Yañı Zelandiya, Panama, Koreya, Büyük Britaniya ve diger memleketlerniñ vekilleri imzalağan vesiqada.
BM Telükesizlik Şurası sentâbrniñ 23-nde Rusiye devam ettirgen cenk vaziyetinde Ukrayinağa bağışlanğan bir toplaşuv keçire.