Yanvarnıñ 22-nde Ukrainanıñ Birleşüv künü qayd etile. Bu munasebet ile QMC Ukraina prezidentiniñ temsilcisi Anton Körineviç, şimdi işğal etilgen Qırımda ve Donbasnıñ işğal altındaki topraqlarında yaşağan Ukraina vatandaşlarınıñ birleşüviniñ vacipligini qayd etti.
“Eger yüz yıl evelsi Dnipro boyundan ve Ğarbiy Ukrainadan ukrainlerniñ birleşüvi müim olsa, bugünde Ukraina topraqlarında, şu cümleden vaqtınca işğal etilgen Qırım ve Donbasta yaşağan bütün Ukraina vatandaşlarınıñ birleşüvi ayrı emiyetke maliktir. Bugün öz devletimizde yaşaymız, amma vatandaşlarımıznıñ çoqu işğal şaraitinde yaşay. Şunıñ içün Birleşüv aktınıñ ve Birleşüv kününiñ emiyeti bugünde beraber olğanımıznıñ ve muvaqqat işğal mıtlaqa bitecegniñ, devlet bayrağımız ise bütün Ukraina üzerinde yelpireceginiñ pek müim bir timsalidir”, – dep yazdı Körineviç öz Facebook saifesinde.
Ukraina Yuqarı Radasınıñ insan aqları vekâletlisi Lüdmila Denisova da yaqın zamanda Qırımnıñ “Ukraina qorantasına qaytacağına” inanğanını bildirdi.
“Bugun bizim, ukrainlerniñ, arzuları bir – Ukraina topraq bütünliginiñ ğayrıdan tiklenilüvi, qanunsız sürette apis etilgen vatandaşlarımıznıñ azat etilüvi ve Şarqta tınçlıq oluvı. Eminim ki, eñ yaqın vaqıtta menim tuvğan Qırımım, Donbasnıñ vaqtınca işğal etilgen topraqları Ukraina qorantasına qaytacaq. Ve bu, 102 yıl evel ĞUHC ve UHC-niñ birleşme aktı olğanı kibi, devletimizniñ tarihında daa bir parlaq saife olacaq. Ukrainanıñ Birleşüv künü hayırlı olsun!” – dep yazdı Denisova.
«Живая цепь» в 1990 году от Львова до Киева – фотоархив
Ukraina Birleşüv Künü er yıl Ukraina Halq Cumhuriyeti ve Ğarbiy Ukraina Halq Cumhuriyetiniñ bir ukrain devletine birleşüviniñ aktı 1919 senesi yanvarniñ 22-nde ilân etilgen künü qayd etilmekte.
