Qırım musulmanları diniy idaresiniñ yolbaşçısı Ayder Rustemov Rusiyeniñ Ukrayınağa qarşı cenkini cihat dep adlandırğan Çeçenistannıñ din adamlarını «raşizm sıfatını alğan mutantlar» dep adlandırdı.
«Rusiye – bir yalan devletidir. Çeçenistandaki müfti ve imamlar… Olarğa çeçen demeyip, bular kadırovlılar. Raşizm sıfatını alğan mutant çeçenler. Rusiye başlatqan deşetli cenk bütün milletler içün suvboldüç oldı», – dep ayttı Rustemov Kavkaz.Realii intervyüsında.
Rusiye cenk esirlerini o, «mında öldürmege kelgen cinayetler» olaraq adlandırdı.
«Olar ne olacaq ve ne yapılacaq organlar qarar ala. Men Ukrayına esirlerimizge deñiştirmege dep tüşünem ya da başqa bir variant – aralarında peşman olıp, Ukrayına tarafında batalyonlarğa qoşulğanlar olsa. Olar Ukrayınağa yapqan areketlerinen yardım etip, olarnı mında yollağanlarğa qarşı silâ doğrulta bile», – dedi Rustemov.
Çeçenistan yolbaşçısı Ramzan Kadırov Qırım musulmanları diniy idaresiniñ yolbaşçısı Ayder Rustemovnı taqipnen qorquzmağa tırıştı – müftiniñ çeçen askerlerinen subetine böyle cevap berdi. Siyasetçi esirler Rusiyege qaytarılsa, Rustemovdan intiqam almaq içün birden cenkke qaytmalı, dep bildirdi. Oktâbr ayında Çeçenistan yolbaşçısı esir tüşken Ukrayına arbiylerinen rezidentsiyasında laf etken edi.
Yanvarniñ soñunda ukrayınalı bloger Volodımır Zolkinniñ kanalında Qırım müftisiniñ aralarında beş çeçen arbiyi olğan cenk esirlerinen subeti derc etildi. Rustemov Ukrayınağa qarşı cenk cinayeti ve ne içün oña Çeçenistan akimiyeti adlandırğan cihat aytmağa olmağanını ayttı. Müfti esir musulmanlarnen ekinci kere körüşe, evelki körüşüv keçken seneniñ avgust ayında oldı.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
2016 senesi noyabr ayında Qırımdan köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı.
2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
